Каардынацыйная рада большасцю галасоў прыняла агульную стратэгію дзеянняў дэмакратычных сілаў Беларусі на прэзідэнцкіх выбарах, прызначаных Аляксандрам Лукашэнкам на 26 студзеня 2025 года.
Стратэгія была распрацаваная разам з Оіфсам Святланы Ціханоўскай, Аб'яднаным пераходным кабінетам і Каардынацыйнай радай.
«Была сфармаваная працоўная група, якая некалькі месяцаў працавала над гэтым дакументам. У ім выкладзеныя асноўныя дзеянні і пазіцыі дэмакратычных сілаў, а таксама план дзеянняў, прапанаваны беларусам. Гэтая стратэгія – наш адказ недэмакратычным «бязвыбарам» Лукашэнкі», – пракаментавала спікерка Каардынацыйнай рады Анжаліка Мельнікава.
У агульнай заяве дэмакратычных сілаў зазначаецца, што гэтая электаральная кампанія праводзіцца ў сітуацыі глыбокага палітычнага крызісу ў Рэспубліцы Беларусь, а Лукашэнка незаконна ўтрымлівае ўладу шляхам рэпрэсіяў супраць беларускага грамадства, абапіраючыся на падтрыманне Крамля.
,,«У 2025 годзе адбудуцца так званыя прэзідэнцкія выбары ў Беларусі, а на самой справе – бязвыбары, таму што права выбару ў людзей скрадзенае», – гаворыцца ў заяве.
Дэмсілы патрабуюць:
• спынення ўсіх відаў рэпрэсіяў;
• вызвалення ўсіх палітзняволеных;
• рэалізацыі права ўсіх грамадзянаў Беларусі на паўнавартасны ўдзел у выбарах незалежна ад месца жыхарства;
• забеспячэння свабоды сходаў і роўнага доступу да сродкаў масавай інфармацыі;
• правядзення выбараў у адпаведнасці з міжнароднымі стандартамі АБСЕ і пад кантролем назіральнікаў.
«Калі гэтыя патрабаванні не будуць выкананыя рэжымам, мы лічым тое, што адбудзецца ў 2025 годзе, імітацыяй выбарчага працэсу і прапануем выказаць свой пратэст шляхам галасавання супраць усіх, хто крадзе нашае права голасу», – заклікаюць дэмсілы.
Аўтары заявы абяцаюць прапрацаваць і прапанаваць іншыя варыянты, як выказаць пратэст, у залежнасці ад развіцця сітуацыі.
,,«Такім чынам мы пакажам, што беларускае грамадства дагэтуль выступае супраць Лукашэнкі і патрабуе свабодных і справядлівых выбараў», – рэзюмуюць Офіс Ціханоўскай, АПК і Каардынацыйная рада.
Выбары прэзідэнта Беларусі прызначаныя на 26 студзеня 2025 года. Гэта будуць сёмыя ў гісторыі незалежнай Беларусі прэзідэнцкія выбары. Пасля папярэдніх, што адбыліся 9 жніўня 2020 года, у краіне пачаліся жорсткія масавыя рэпрэсіі, якія працягваюцца дагэтуль.
Марыя Міхалевіч belsat.eu
